Sá Ljóti frumsýndur og sýndur aftur og aftur...

Sá Ljóti var frumsýndur um daginn og viðtökurnar hafa verið ansi góðar.  Gagnrýnendur ánægðir, 4 stjörnur í fréttablaðinu og Jón Viðar sagði að Hallur og Viggi væru eins og fiskar í vatni. Hér eru nokkur brot:

 "Ég get ekki annað en mælt með því að sem flestir drífi sig á Smíðaverkstæðið og sjái Þann Ljóta.  Verkið er bæði spennandi og skemmtilegt. Og það nærir hugann lengi á eftir." Unnur María Bergsveinsdóttir á kistan.is           

"Ástæðurnar til að fara að sjá Þann Ljóta eru list leikhússins sem þarna nær hæstu hæðum. Á sviðinu (Stígur Steinþórsson) er eiginlega ekki neitt: hvítir veggir,  fjórir hvítir kassar - og leikararnir.  Þetta er þeirra sýning, og þeir fara af frábærri leikni með textann sem er þéttur, snarpur og fyndinn, feiknavel þýddur af Bjarna Jónssyni. ...Sá Ljóti er sjaldgæf leikhúsupplifun sem ekki má missa af." Silja Aðalsteinsdóttir á tmm.is

"Þetta er ekki auðvelt verk í uppsetningu en Kristínu Eysteinsdóttur tekst listavel að skila því til áhorfenda ...Þetta  er vel unnin sýning, skemmtileg og óvenju skýrt hugsuð." María Kristjánsdóttir Morgunblaðið 8. apríl

"Um er að ræða leikrit sem allir sem sjaldan eða aldrei fara í leikhús hefðu gott af því að sjá. Hér er ekki um neina predikun að ræða, síður en svo, heldur mjög þétta og vel unna textavinnu þar sem samskiptin ganga listilega vel fyrir sig og þó svo að leikmyndin sé aðeins snjóhvít og ekkert verið að gera þegar menn segist vera að gera eitthvað, þá er víst öruggt að myndir sem flugu upp í huga hvers og eins í salnum voru vafalítið fleiri og litskrúðugri en oft vill verða þegar verk eru yfirhlaðin af táknum og leikmunum. Elísabet Brekkan Fréttablaðið 7. apríl

"Þetta var nú aldeilis skemmtileg uppfærsla - og falslaus. ...Óhætt er að mæla með þessari uppsetningu við unga sem aldna (og fallega sem ljóta) því allir geta dregið heilmikinn lærdóm af boðskap hennar - burtséð frá útliti sínu.  Ljóta fólkið hér í veganesti örlitla huggun harmi gegn á meðan við fallega fólkið erum áminnt um að fegurðin skapar ekki hamingjuna. Þó hún komi manni langleiðina. ... 4 stjörnur" Spesi á baggalutur.is

"Sá Ljóti er verk andstæðna, það er bæði fyndið og sorglegt, flókið og einfalt, yfirmáta fínlegt og afskaplega groddalegt, dapurlega fallegt og óskaplega ljótt.  Hér er fáránleiknum á bakvið flatneskju útlitsdýrkunar skellt fram umbúðalaust.  Hér verður ekki hjá því komist að horfast í augu við sjálfan sig og fordóma sína og ekki síst ísmeygilega framsetningu þeirra.  Hér er nefnilega allt á borðinu" Þorgerður E. Sigurðardóttir Rás 1, Víðsjá 15. apríl

                                             

 

Við erum líka hæstánægð með útkomuna, Sá Ljóti er rós í hnappagatið hjá okkur morðingjunum.  Það hafa verið sýndar 6 sýningar og uppselt á þær allar.  Næstu sýningar verða 24.apríl, 25. apríl og 2. maí. Hvort sem þið eruð ljót eða falleg, þá hlökkum við til að sjá ykkur!!